Вилояти Мухтори Кўҳистони Бадахшон дорои табиати нодир буда, баҳри дидан намудан аз минтақаҳои сайёҳӣ ва таърихии он сайёҳони зиёде аз дохилу хориҷ сафар менамоянд. Бо мақсади тозаву зебо нигоҳ доштани роҳҳои нақлиётӣ, пешгири аз ифлосшавии шафати роҳҳо хусусан напартофтани зарфҳои пластикию политиленӣ, баланд бардоштани сатҳи муносибати ронандагон бо мусофирон аз ҷониби намояндагони Муассисаи давлатии “Нақлиёти автомобилӣ ва хизматрасонии логистикӣ”, Хадамоти давлатии назорат ва танзими нақлиёт дар ВМКБ бо кормандони терминалҳои мусофирбарӣ ва ронандагони ҷамъиятҳои нақлиёти автомобилӣ корҳои маърифатию фаҳмондадиҳӣ бурда шуд. Зимни мулоқоти гурўҳи корӣ бо ронандагон ва роҳбарони ҷамъият ва корхонаҳои нақлиётӣ сардори Раёсати Муассисаи давлатии “Нақлиёти автомобилӣ ва хизматрасонии логистикӣ” Бахтиёрова Фирўза аз ҳадаф ва иқдомҳои Ҳукумати Ҷумҳурии Тоҷикистон дар самти  ҳифзи муҳити зист, хусусан тоза нигоҳ доштани роҳҳои кишвар ва баланд бардоштани сатҳи хизматрасониҳои нақлиётиву логистикӣ ёдовар шуда, аз масъулини ҷамъиятҳои нақлиёти автомобилӣ ва ронандагон даъват ба амал овард, ки дар самти иҷрои рисолати касбӣ ва уҳдадориҳои шаҳрвандӣ ба саҳлангорӣ роҳ надиҳанд. Ҳаминро бояд гуфт, ки ҳифзи муҳити зист, истифодаи оқилона ва барқарорсозии захираҳои он, рисолати ҳар шахси накў буда, анҷоми кучактарин кор дар самти беҳдошти табиат самарае хубе барои наслҳои имрўзу фардо хоҳад гузошт.