Дар натиҷаи мулоқоту гуфтушунидҳо дар сатҳи олӣ дар ҷараёни сафари давлатии Президенти Федератсияи Русия имрӯз дар Қасри миллат 16 санади нави байнидавлатӣ, байниҳукуматӣ ва байниидоравӣ, аз ҷумла, «Харитаи роҳ» оид ба ҳамкории ду кишвар дар соҳаи нақлиёт, ба имзо расиданд. Дар ин бора Хадамоти матбуоти Президенти ҶТ хабар медиҳад.

Зери Изҳороти муштараки Президенти Ҷумҳурии Тоҷикистон ва Президенти Федератсияи Русия дар бораи амиқ гардонидани муносибатҳои шарикии стратегӣ ва иттифоқӣ байни Тоҷикистону Русия сарони ду давлат — муҳтарам Эмомалӣ Раҳмон ва муҳтарам Владимир Путин имзо гузоштанд.
Дар байни ҳуҷҷатҳои имзошуда Нақшаи тадбирҳои амалӣ («Харитаи роҳ») байни Вазорати нақлиёти Ҷумҳурии Тоҷикистон ва Вазорати нақлиёти Федератсияи Россия оид ба ҳамкорӣ дар соҳаи нақлиёт барои солҳои 2025-2030 низ ҳаст. Онро Вазири нақлиёти Ҷумҳурии Тоҷикистон Азим Иброҳим ва Вазири нақлиёти Федератсия Русия Андрей Никитин имзо карданд.
Тибқи Нақшаи тадбирҳои амалӣ («Харитаи роҳ») оид ба ҳамкорӣ дар соҳаи нақлиёт байни вазоратҳои нақлиёти Ҷумҳурии Тоҷикистон ва Федератсияи Россия барои солҳои 2025-2030, аз ҷумла, чунин пешбинӣ шудааст:
- фароҳам овардани шароит барои зиёд кардани ҳамлу нақли тавассути нақлиёти автомобилӣ ва роҳи оҳан миёни Тоҷикистону Русия (аз ҷумла, муқаррар намудани тарифҳои мусоид ва аз байн бурдани маҳдудиятҳои ҳамлу нақл аз кишварҳои сеюм );
- таҳияи пешниҳодҳои муштарак оид ба ҳавасмандгардонии интиқолдиҳандагони Тоҷикистон дар амалӣ намудани ҳамлу нақли дуҷонибаи автомобилӣ байни Тоҷикистону Русия, аз ҷумла интиқоли маҳсулоти кишоварзӣ аз Тоҷикистон ба Русия бидуни рухсатнома, тавре дар Созишномаи байни ҳукуматҳои ду кишвар пешбинӣ шудааст;- то декабри соли 2030 ҳайати ҳаракаткунанда барои навсозии парки роҳи оҳан ба Ҷумҳурии Тоҷикистон расонида мешавад; 
- то декабри соли 2030 интиқоли таҷрибавии боркашонии мултимодалӣ дар самти Русия, Баҳри Хазар, Туркманистон, Узбекистон, Тоҷикистон роҳандозӣ карда мешавад;
- то моҳи декабри соли 2026 масъалаи муттаҳидсозии борҳо (сохтмони анборҳои «А» ва «В+») дар қаламрави Тоҷикистон коркард карда мешавад;
- то охири соли 2025 ҷаласаи Комиссияи муштараки Тоҷикистону Русия оид ба масъалаҳои ҳамкорӣ дар соҳаи нақлиёти автомобилӣ баргузор мегардад.
                                                                                                                                                               Бознашр аз сомонаи  www.mintrans.tj