Ҳайати Ҷумҳурии Тоҷикистон бо роҳбарии Вазири нақлиёти Ҷумҳурии Тоҷикстон барои иштирок дар Маҷлиси машваратии даҳуми вазирони нақлиёт ва ҷаласаи гуруҳи коршиносони кишварҳои узви Созмони Ҳамкории Шонҳой (СҲШ) дар шаҳри Ню-Деҳлии Ҷумҳурии Ҳиндустон қарор дорад. Вазири нақлиёти Ҷумҳурии Тоҷикистон Азим Иброҳимро дар  сафари кории мазкур муовини сардори Раёсати робитаҳои байналмилалии Вазорати нақлиёт Суҳроб Нурулло ва директори Муассисаи давлатии “Нақлиёти автомобилӣ ва хизматрасонии логистикӣ” - и Вазорати нақлиёти Ҷумҳурии Тоҷикистон Раҳмиддин Саломзода ҳамроҳӣ мекунанд.  Тибқи барномаи пешбинишуда, ҷаласаи гурӯҳи кории  коршиносони кишварҳои узви СҲШ ба кори худ шуруъ намуд, ки дар он намояндагони давлатҳои узви СҲШ ба таври ҳузурӣ ва маҷозӣ иштирок доранд. Намояндаи ҷониби раисикунанда – кишвари Ҳиндустон ҷаласаи гуруҳи кориро бо суханони ифтитоҳӣ оғоз намуда, меҳмонону иштирокчиёни ҷаласаро ба шаҳри Ню-Деҳлӣ, пойтахти Ҷумҳурии Ҳиндустон хайрамақдам гуфт ва ба онҳо барори кор орзу намуд. Дар ҷаласаи гуруҳи кории коршиносони СҲШ нахуст баррасӣ ва муҳокимаи лоиҳаи Консепсияи ҳамкории кишварҳои узви СҲШ оид ба декарбонизатсияи (кам намудани таъсири карбон ба муҳити зист) нақлиёт, пешбурди трансформатсияи рақамӣ ва технологияҳои инноватсионӣ барои ноил шудан ба самаранокӣ ва устувории баланд пешниҳод гардид. Ҳадафҳои асосии қабули Консепсияи мазкур, пеш аз ҳама, кам кардани таъсири карбон ба муҳити зист аз сӯзишвории истифодашаванда, истифодаи технологияҳои алтернативии сӯзишвории нақлиётӣ, инчунин декарбонизатсияи нақлиёт бо мақсади коҳиш додани партовҳои автомобилҳо то соли 2030 тавассути тавсеаи истифодаи манбаъҳои тоза ва барқароршавандаи энергияи оянда ва талош барои таҳия ва пешбурди технологияҳои ба оянда мутобиқ, яъне омӯхтани ҷойгузинҳои (алтернативаҳои) тозатар ва “сабзтар” мебошад. Мусоидат ба трансформатсияи рақамӣ дар нақлиёт бо мақсади ноил шудан ба истифодаи бештар ва самараноки инноватсияҳои ҷаҳонӣ ва таҷрибаҳои пешқадам низ аз ҳадафҳои дигари консепсияи мазкур маҳсуб меёбанд. Дар назар аст, ки лоиҳаи Консепсияи мазкур баъди баррасии гурӯҳи кории коршиносони кишварҳои узви СҲШ барои баррасӣ ва тасдиқ ба Маҷлиси машваратии вазирони нақлиёти давлатҳои узви СҲШ пешниҳод мегардад.
                                                                                                                                                                 манбаъ:mintrans.tj