Рўзҳои 5-11 майи соли 2024-ум дар шаҳри Сеули Ҷумҳурии Корея  Семинари омӯзишӣ оид ба лоиҳаи “Нақшаи генералии рушди системаи миллии логистикии Ҷумҳурии Тоҷикистон” баргузор гардид. Дар кори ин Семинар ҷониби Тоҷикистонро кормандони Муассисаи давлатии «Нақлиёти автомобилӣ ва хизматрасонии логистикӣ» зери роҳбарии директори ин муассиса Саломзода Раҳмиддин  намояндагӣ намуданд. Дар рафти чорабинӣ аз тарафи YU Ok-dong, ки ҳамчун масъули ширкати иҷрокунандаи лоиҳа ба ҳисоб меравад, ҳисоботи фосилавии лоиҳаи “Нақшаи генералии рушди системаи миллии логистикии Ҷумҳурии Тоҷикистон”   пешниҳоди  ширкатдорон гардонида шуд. Дар нақшаи лоиҳаи пешниҳодшуда ҳаҷм, муҳлати иҷроиш, ҷадвали корӣ, сафари кории ҷониби ширкат ба Тоҷикистон ва вохурӣ бо сохторҳои давлатиро дарбар гирифта, таҳлил ва методологияи лоиҳа, вазъи иқтисоди ҷаҳон ва ҳолати иқтисодиёти бозори имрўза рўи кор оварда шуд. Дар баробари ин, вобаста ба потенсиал ва имкониятҳои ҷуғрофии Тоҷикистон маълумот пешниҳод шуда, вобаста ба муносибатҳои савдои Тоҷикистон бо давлатҳои ҳамсоя низ тавсияҳо пешкаш гардид. Дар доираи нақшаи баргузории семинари омӯзишӣ мутахассисони соҳа аз Мактаби логистикии Осиё ва Уқёнуси Ором, Мактаби олии логистикӣ вобаста ба таърихи логистикаи Корея дар робита ба масъалаҳои ҷойдошта ва роҳҳои ҳалли он ба иштирокдорони семинар маълумот доданд. Дар рафти семинар инчунин, вобаста ба модели идоракунӣ ва тарзи баланд бардоштани самаранокии соҳаи логистика, қисми назариявии рушди логистика аз ибтидо то истифодаи технологияи автоматикунонии соҳаи нақлиёт, рушд ва табаддулоти рақамӣ, логистикаи байналмилалӣ, мушкилоти сохтмони парки логистикӣ, интиқоли мултимодалии бор тавасути нақлиёти обӣ, заминӣ ва ҳавоӣ низ маълумот дода шуд. Баъд аз анҷоми рунамо, тибқи нақшаи чорабинӣ маросими баимзорасонии Ёддошти хотиравӣ баргузор гадида, он аз ҷониби Вазорати нақлиёт, бонки кореягии Eximbank ва ширкати PwC Корея ба имзо расонида шуд. Мувофиқи нақша, боздиди иштирокдорони семинар аз корхонаҳои вобаста ба логистика ва инфрасохтори нақлиётии Корея, хусусан аз Минтақаи озоди иқтисодии шаҳри Ичхони Корея, Маркази нақлиёти Агентии роҳҳои автомобилии Корея ва Маркази логистикаи хунукнигоҳдории Кореяи Ҷанубӣ сурат гирифт, ки иштирокдорон дар робита ба таърихи бунёди Минтақаи озоди иқтисодӣ, тарзи дурусти ташкили минтақа барои сармоягузорӣ, фаъолияти босамари мониторинги ҳолати роҳҳои Корея бо бартарафнамоии ҳолатҳои садамавӣ, инчунин вобаста ба инфрасохтори Марказ ва технологияи тавлиди сардӣ барои нигоҳдории маҳсулот маълумоти муфид гирифтанд.