Дар доираи Конференсияи байналмилалӣ таҳти унвони «Роҳ ба сӯи Тён-Шон» миёни Муассисаи давлатии “Нақлиёти автомобилӣ ва хизматрасонии логистикӣ”-и Вазорати нақлиёти Ҷумҳурии Тоҷикистон ва Маркази байналмилалии логистикии Ҷинлидаи шаҳри Қошғар Ёддошти тафоҳум оид ба ҳамкорӣ дар соҳаи нақлиёт ва логистика ба имзо расид. Қобили зикр аст, ки муносибатҳои дипломатӣ миёни Ҷумҳурии Тоҷикистон ва Ҷумҳурии Мардумии Чин аз 4 январи соли 1992 маншаъ мегирад. Рӯзҳои 1-2 ноябри соли 2023-юм ҳайати чинӣ таҳти роҳбарии узви Бюрои сиёсии Кумитаи Марказии Ҳизби коммунистии Чин, котиби якуми Кумитаи ҳизби коммунистии Ноҳияи Мухтори Синзян-Ӯйғури Ҷумҳурии Мардумии Чин Ма Синжуй ба Тоҷикистон ташриф оварда буданд. Дар доираи ин сафар Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон,  Ма Синжуйро ба ҳузур пазируфта, зимни мулоқот масъалаҳои марбут ба муносибатҳои дӯстӣ, ҳамкорӣ миёни Ҷумҳурии Тоҷикистон ва Ҷумҳурии Мардумии Чинро дар чорчӯби шарикии ҳамаҷонибаи стратегӣ мавриди баррасӣ қарор доданд.