22 июл, вохурии навбатии намояндагони Муассисаи давлатии «Нақлиёти автомобилӣ ва хизматрасонии логистикӣ»-и Вазорати нақлиёти Ҷумҳурии Тоҷикистон бо кормандони ҷамъият ва ширкатҳои нақлиёти автомобилӣ дар шаҳри Бохтар баргузор гардид. Дар ин ҳамоиш нахуст вобаста ба масъалаи нархномаи нави хизматрасониҳои пулакии МД «Нақлиёти автомобилӣ ва хизматрасонии логистикӣ» маълумот дода шуд. Ҷаҳонгир Пиров - муовини аввали директори муассиса дар шарҳи ин мавзўъ таъкид дошт, ки беқурбшавӣ (инфляция) дар Ҷумҳурии Тоҷикистон соли 2022 4,2 % ва соли 2023 3,8 % -ро ташкил намуда,  музди  меҳнат аз 600  то 800 сомонӣ  зиёд  карда шуд. Илова бар ин тибқи қарори Ҳукумати Тоҷикистон аз 13-уми январи соли 2024-ум №5 музди меҳнати кормандони соҳаи буҷетӣ то 40 %  зиёд гардид. Ин дар ҳолест, ки МД «НА ва ХЛ» худмаблағгузор буда, фаъолияташ  ба  хизматрасониҳои пулакӣ алоқаманд аст. Дар идома роҷеъ ба афзалияти барномаи электронии роҳхату борхат маълумот дода шуда, зикр гардид, ки гузариш ба барномаҳои электронӣ дар баробари  пешгирӣ аз харҷи зиёдатӣ дар таъмини амнияти иттилоотӣ нақши бориз дорад. Зеро барномаи роҳхату борхат бо иқтидорӣ ҳаҷман калон дар сервери яке аз ширкатҳои мобилӣ маҳфуз аст ва рўз то рўз талаботи ширкат ва ҷамъиятҳои нақлиётӣ барои гузариш ба ин барнома зиёд мегардад. Дар идома маълумот дода шуд, ки муассиса барои боз ҳам баланд бардоштани сифати курсҳои бозомӯзӣ ва такмили ихтисос мутахассисони ҳирфавиро ҷалб намудааст, ки ин  барои баланд бардоштани малакаи касбии кормандони бахши нақлиёт самари хубе ба бор хоҳад овард. Дар қисмати дигари маҷлис миёни иштирокчиён роҷеъ ба тартиби  иштирок дар дар озмӯн (тендер), вобаста намудани хатсайрҳои мусофирбарӣ, аз аккредитатсия гузаронидани ташкилотҳои нақлиёти автомобилӣ ва дигар масъалаҳои марбут ба бахши нақлиёт табодули афкор сурат гирифт.