29.07.2024 дар Муассисаи давлатии “Нақлиёти автомобилӣ ва хизматрасонии логистикӣ” ҷаласаи васеи корӣ бо иштироки кормандони муассиса, роҳбарони ширкату ҷамъиятҳои нақлиётӣ ва намояндагони сохторҳои марбута баргузор гардид. Дар кори маҷлис масъалаҳои ташкил намудани филиали муассисаҳои нақлиёти мусофирбар дар Ҷумҳурии Тотористони Федератсияи Русия, роҳандози намудани хатсайрҳои мусофирбарӣ миёнӣ шаҳрҳои Бугулма ва Лениногорск, гузариш ба рақамикунонии соҳа, нархномаи нави хизматрасониҳои нақлиётӣ логистикӣ мавриди таҳлилу баррасӣ қарор гирифт. Раҳмиддин Саломзода директори Муассисаи давлатии “Нақлиёти автомобилӣ ва хизматрасонии логистикӣ” дар мавриди раванди гузариш ба рақамикунонии соҳа қайд намуд, ки дар ин самт қарори Ҳукумати Ҷумҳурии Тоҷикистон “Оид ба ҳукумати электронӣ” аз 30 декабри соли 2011, №643 ва “Консепсияи иқтисоди рақамӣ” аз 30 декабри соли 2019, №642 қабул шудааст ва  гузариш ба ин раванд аз манфиат холи нест. Иттилоъ дода шуд, ки феълан дар кишвар аз 215 корхонаи нақлиётӣ 145- тои он ба барномаи электронӣ фаро гирифта шудаанд. Дар идомаи маҷлис вобаста ба зарурати таҳияи нархномаи нави хизматрасониҳои пулакии МД «Нақлиёти автомобилӣ ва хизматрасонии логистикӣ» маълумот дода шуд. Дар иртибот ба ин мавзўъ қайд гардид, ки беқурбшавӣ (инфляция) дар Тоҷикистон соли 2022 4,2 % ва соли 2023 3,8 % - ро ташкил дода, инчунин музди минималии меҳнат аз 600 сомони то 800 сомонӣ  боло рафт. Ин дар ҳолест, ки Муассисаи давлатии “Нақлиёти автомобилӣ ва хизматрасонии логистикӣ” худмаблағгузор буда, фаъолияташ  ба  хизматрасониҳои пулакӣ алоқаманд аст.  Дар идома роҷеъ ба афзалияти барномаи электронии роҳхату борхат гуфта шуд, ки гузариш ба барномаҳои электронӣ дар баробари  пешгирӣ аз харҷи зиёдатӣ дар таъмини амнияти иттилоотӣ нақши бориз дорад. Зеро барномаи роҳхату борхат бо иқтидорӣ ҳаҷман калон дар сервери яке аз ширкатҳои мобилӣ маҳфуз аст ва рўз то рўз талаботи ширкат ва ҷамъиятҳои нақлиётӣ барои гузариш ба ин барнома зиёд мегардад. Зикр гардид, ки муассиса барои боз ҳам баланд бардоштани сифати таълим дар курсҳои бозомӯзӣ ва такмили ихтисос мутахассисони ҳирфавиро ҷалб намудааст, ки ин  барои баланд бардоштани малакаи касбии кормандони бахши нақлиёт самари хубе ба бор хоҳад овард.
  Дар қисамти дуюми маҷлис ба  моҳияти эълон гардидани соли 2024 “Соли маърифати ҳуқуқӣ” таваҷҷуҳ дода шуда, аз ҷониби роҳбарияти муассиса таъкид гардид, ки Соли маърифати ҳуқуқӣ эълон гардидани соли 2024-ум аз ҷониби Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҳаёти иҷтимоӣ, иқтисодӣ, фарҳангӣ, сиёсӣ ва ҳуқуқии Тоҷикистон нақши муҳим дошта, моро водор месозад, ки  барои боз ҳам сохтани ҷомеаи муттаҳиди маданӣ ва давлати ҳуқуқбунёди миллӣ аз пештар дида зиёд кӯшиш намоем. Дар идома, аъзои маҷлис барои беҳтар намудани сатҳу сифати хизматрасониҳои нақлиётию логистикӣ қарорҳои дахлдор қабул намуданд.