Рўзҳои 13 - 14 - уми ноябри соли 2024-ум дар шаҳри Душанбе семинари машваратӣ оид ба пешниҳоди ҳисоботи аввалин вобаста ба фаъолсозии лоиҳаи «Таҳияи нақшаи сохтмон ва истифодабарии маркази логистикии Кӯлоб» ва лоиҳаи пешакии асосноккунии техникӣ-иқтисодии сохтмони роҳи оҳани пайвастшаванда бо Минтақаи озоди иқтисодии «Кӯлоб» баргузор гардид.
Дар кори ин ҳамоиши машваратӣ намояндагони Эксимбонки Ҷумҳурии Корея, ширкати PwC Ҷумҳурии Корея, намояндагони Вазорати нақлиёти Ҷумҳурии Тоҷикистон, Муассисаи давлатии «Нақлиёти автомобилӣ ва хизматрасониҳои логистикӣ», роҳбарияти Минтақаи озоди иқтисодии Кӯлоб, намояндагони КВД «Роҳи оҳани Тоҷикистон» ва дигар сохторҳои дахлдор иштирок намуданд. Дар семинари мазкур Директори Муассисаи давлатии «Нақлиёти автомобилӣ ва хизматрасониҳои логистикӣ» Раҳмиддин Саломзода бо мақсади мубодилаи иттилоотии илмӣ-амалӣ, ҷиҳати пайдо намудани роҳҳои пешрафти техника ва технологияи навин дар соҳаи нақлиёт, рушди ҳамкориҳо дар татбиқи барномаҳои муштараки илмӣ ва инноватсионӣ, инчунин ҷиҳати роҳандози намудани таҷрибаҳои байналмилалӣ ибрози андеша намуда, таъкид намуд, ки  фаъолсозии лоиҳаи «Таҳияи нақшаи сохтмон ва истифодабарии маркази логистикии Кӯлоб»  дар самти амали гардидани “Барномаи давлатии рушди низоми логистика дар Ҷумҳурии Тоҷикистон барои солҳои 2023 - 2028” низ мусоидат хоҳад кард.   
Дар семинар сардори шуъбаи кор бо сармоягузорони хориҷии Вазорати нақлиёт Суҳроби Нурулло баромад карда, нақши асосии маркази логистикии сохташавандаро дар Минтақаи озоди иқтисодии «Кӯлоб» шарҳ дод.
Дар идомаи ҳамоиш, Директори генералии Эксимбонки Корея – Мун Ҷиҷонг суханрони намуда, барои дар сатҳи баланд омода кардани лоиҳаи пешакии сохтмони маркази логистикии Кӯлоб ибрози андеша кард.
Дар идома аз ҷониби менеҷери лоиҳа, намояндаи ширкати PwC рӯнамо оид ба нақшаҳои амалисозии лоиҳаи мазкур пешниҳод карда шуд.