Чанде пеш аз ҷониби Вазорати корҳои хориҷӣ ба Вазорати нақлиёти Ҷумҳурии Тоҷикистон ёддошти Сафорати Федератсияи Россия дар Ҷумҳурии Тоҷикистон таҳти №125/ко аз 29 -уми ноябри соли 2024-ум оид ба қарори Ҳукумати Федератсияи Россия таҳти №1510 аз 7 – уми ноябри соли 2024 – ум “Дар бораи гузаронидани озмоиш оид ба санҷиши қоидаҳо ва шартҳои вуруд ба Федератсияи Россия, инчунин хуруҷ аз Федератсияи Россия барои шаҳрвандони хориҷӣ ва шахсони бешаҳрванд” ирсол гардид. Дар ёддошт иттилоъ дода шудааст, ки шурўъ аз 1-уми декабри соли 2024-ум озмоиш оид ба санҷиши қоидаҳо ва шартҳои вуруд ба Федератсияи Россия ва хуруҷ аз Федератсияи Россия барои шаҳрвандони хориҷӣ ва шахсони бешаҳрванд ҷорӣ гардидааст. Озмоиш бо мақсади таъсиси профили рақамии шаҳрвандони хориҷӣ ва шахсони бешаҳрванд гузаронида шуда, маҷмўи маълумотро, ки аз ҷониби шаҳрвандони хориҷӣ ва шахсони бешаҳрванд, инчунин мақомоти ваколатдор ва ташкилотҳои дар гузаронидани озмоиш иштирокдошта, ба низомҳои иттилоотии давлатӣ пешниҳод мегарданд, дар бар мегирад. Озмоиш ду намуди убури сарҳади давлатии Федератсияи Россияро фаро гирифта, аз рӯйи вақти гузаронидан, фарогирии қаламрав ва аз маҷмўи маълумоти пешниҳодшуда фарқ мекунанд. Даври аввал аз 1- уми декабри соли 2024-ум то 30 - юми июни соли 2026-ум дар гузаргоҳҳои ҳавоии сарҳади давлатии Федератсияи Россия дар фурудгоҳҳои байналмилалии Москва (Шереметево), Москва (Домодедово), Москва (Внуково), Жуковский (вилояти Москва) ва нуқтаи гузаргоҳи автомобилии Маштаково (вилояти Оренбург) муқаррар карда шудааст. Дар доираи он маълумоти шахсии биометрии шаҳрвандони хориҷӣ (акси чеҳра ва шакли папиллярии ангўштони шахс) ҷамъоварӣ карда мешавад. Даври дуюм аз 30-юми июни соли 2025-ум то 30-юми июни соли 2026-ум дар ҳама гузаргоҳи сарҳади давлатии Федератсияи Россия ҷорӣ гардида, иҷрои коидаҳои ташкили озмоишро ба истиснои ҷамъоварии маълумоти биометрӣ пешбинӣ менамояд. Ҳамзамон, шаҳрвандони хориҷие, ки бо тартиби низоми бераводид нияти ворид шудан ба Федератсияи Россияро доранд, бояд то вуруд ба кишвар раванди сабти номро дар низоми ягонаи идентификатсия ва аутентификатсия бо истифода аз замимаи мобилии портали ягона гузаранд ва на дертар аз 72 соат пеш аз вуруди пешбинишуда ба Федератсияи Россия бо истифода аз замимаи мобилии портали ягона дар шакли электронӣ ариза барои вуруд ва будубош дар  Федератсияи Россия пешниход намоянд (дар ҳолатҳои фавқулода - на дертар аз 4 соат).
 Аз ин рў, аз тамоми шаҳрвандони Ҷумҳурии Тоҷикистон хоҳиш карда мешавад, ки ҳангоми рафту омад ва ё вуруд ба қаламрави Федератсияи Россия талаботи пешбинигардидаро риоя намоянд. Дар ҳолати тафтишу азназаргузаронӣ қоидаву тартиботи ҷамъиятиро риоя намоянд.