07.01.2025. Дар маҷлисгоҳи Вазорати нақлиёти Ҷумҳурии Тоҷикистон ҷаласаи васеъ, оид ба натиҷагирӣ аз фаъолияти МД «Нақлиёти автомобилӣ ва хизматрасонии логистикӣ» дар соли 2024-ум баргузор гардид, ки дар кори он муовини Вазири нақлиёти Ҷумҳурии Тоҷикистон Шоиста Саидмуродзода, директори МД «Нақлиёти автомобилӣ ва хизматрасонии логистикӣ» Раҳмиддин Саломзода, муовинони директор, сардорони раёсат ва шуъбаҳои муассиса иштирок намуданд.
Дар маҷлис маълумот дода шуд, ки муассиса, ҳамчун мақоми ваколатдори давлатӣ дар идоракунии соҳаи нақлиёти автомобилии ҷумҳурӣ, дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, қарорҳои Ҳукумати Ҷумҳурии Тоҷикистон, фармоишу дастурҳои Вазорати нақлиёти Ҷумҳурии Тоҷикистон ва талаботи санадҳои меъёрии ҳуқуқии танзимкунандаи соҳаи нақлиёти автомобилиро асоси фаъолияти корӣ қарор дода, баҳри иҷрои вазифа ва уҳдадориҳои оинномавии худ кушиш  ба харҷ медиҳад.
 Мутобиқи нақшаи кории муассиса гуруҳҳои корӣ бо иштироки роҳбарият, сардорони раёсат ва шуъбаҳои дахлдори муассиса, ҷиҳати вусъат бахшидани раванди рақамикунонии варақаҳои роҳхат ва борхат, беҳтар намудани ҳисоботи омории нишондиҳандаҳои асосии соҳаи нақлиёти автомобилӣ, омӯзиши дарсҳои 20 - соатаи Қоидаҳои бехатарии ҳаракат дар роҳ ва одоби муошират бо мусофирон ва барои ҳалли дигар масъалаҳои ҷойдошта дар шаҳру ноҳияҳои ҷумҳурӣ корҳои омӯзишӣ ва фаҳмондадиҳӣ гузаронида шуд. Дар натиҷаи андешидани чораҳои мақсаднок ҳисоботҳои омории нишондиҳандаҳои асосӣ нисбат ба соли гузашта аз 103% то 121,2% таъмин гардида, фарогирии варақаҳои роҳхат нисбат ба соли гузашта, 100,8% - ро ташкил дод.
Натиҷаи корҳои иҷрошуда собит намуданд, ки аз 48989 адад воситаҳои нақлиёти дар иқтисодиёт фаъолияткунанда 46448 адади он бо варақаи роҳхату борхат фаро гирифта шудаанд. Аз он ҷумла, 12678 адад воситаҳои нақлиёти автомобилии корхонаҳои ғайринақлиётӣ бо варақаи роҳхату борхат фаро гирифта шуда, натиҷаи фаъолияти онҳо ба ҳисоботи оморӣ ворид карда шудаанд.
Нишондиҳандаҳои асосии омории соҳа дар соли 2024, ҳаҷми мусофирбарӣ 903 млн. 986 ҳазору 400 мусофир, нисбат ба  ҳамин давраи 2023с. 110,8 %, гардиши мусофир 8 млрд. 831 млн. м.км. нисбат ба ҳамин давраи 2023 с. 111,2 %, ҳаҷми бор 37 млн. 94 ҳазор  тонна нисбат ба соли 2023 с. 109,4 %, гардиши бор  3 млрд 81 млн. 400 ҳазор т.км. нисбат ба соли 2023 с., 121,2 % таъмин карда шудаанд.
 Инчунин дар маҷлис, оид ба Амалисозии Нақшаи амали “Барномаи давлатии рушди низоми логистика дар Ҷумҳурии Тоҷикистон барои солҳои 2023 - 2028” дар марҳилаи якум (солҳои 2023 - 2025), раќамикунонии вараќањои роњхату борхат, баланд бардоштани сатҳи хизматрасонии босифат  дар  хатсайрҳои мусофирбарии шаҳрӣ, наздишаҳрӣ ва байнишаҳрӣ, ташкил ва гузаронидани озмунҳо, таҳия ва тасдиқи нақшаи ҷадвали ҳаракати хатсайрҳо, нақши намояндагони муассиса дар таҳия ва қабули ёддоштҳо, ҳамкориҳои байналмилалии муассиса бо кишварҳои минтақа, баргузории вохуриҳо, семинарҳо, конференсия, мизҳои мудаввар оид ба рушди логистика, рафти ҳисоботи варақаҳои роҳхати байналмилалӣ, корти тахографи рақамӣ ва оид ба дигар ҷанбаҳои фаъолияти муассиса маълумот дода шуд.