Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба таваҷҷӯҳи шаҳрвандон ва меҳмонони кишвар мерасонад, ки тибқи маълумоти Агентии ҳавошиносии ҷумҳурӣ аз 17-ум то 20-уми январи соли 2025 дар ноҳияҳои кӯҳӣ ва наздикӯҳии тобеи ҷумҳурӣ ва дар ҳудуди шаҳри Душанбе бориши барфу борон дар назар дошта шудааст. Дар аксари ноҳияҳои кӯҳии тобеи ҷумҳурӣ боришоти шадид, паст шудани ҳарорат ва туман дар назар аст. Дар шоҳроҳҳои Душанбе-Чаноқ, Душанбе-Рашт-Лахш, Нуробод-Сангвор, Душанбе-Хоруғ хатари лағзиши тарма, яхбандӣ ва резиши санг аз кӯҳҳу теппаҳо боқӣ мемонад.  Дар робита ба ин Кумита аз шаҳрвандони кишвар хоҳиш мекунад, ки ҳангоми истифода аз таҷҳизоти гармкунии барқӣ қоидаҳои бехатарии сӯхторро қатъиян риоя намуда, аз дастгоҳҳои  барқии худсохт истифода набаранд. Пеш аз сафар омодагии мошинҳоро бисанҷанд, чархҳои тобистонаро бо зимистона иваз кунанд. Талош кунанд мошинашон бо доруқуттии пур аз доруҳои зарурӣ таъмин бошад. Бидуни телефонҳои мобилии омода ба сафар баромадан мумкин нест.  Сокинони навоҳии кӯҳиву назикӯҳӣ дар чунин рӯзҳо дар чорвочаронӣ, ғунучини ҳезум, шикор, моҳидорӣ эҳтиёт кунанд.  Дар робита ба ин, КҲФ аз шаҳрвандон хоҳиш мекунад, ки дар ин рӯзҳо ҳаракати худро дар роҳҳои кӯҳӣ маҳдуд намуда, аз анҷоми корҳои кишоварзӣ, чаронидани чорво, ҷамъоварии ҳезум ва шикор дар манотиқи кӯҳистон худдорӣ кунанд, инчунин ҳангоми истифодаи таҷҳизоти барқии гармкунанда қоидаҳои бехатарии сӯхторро қатъиян риоя намоянд.
Дар ҳоли рух додани ҳолати фавқулода шумо метавонед ба рақами 112 ва ё телефонҳои  (+992) 93-880-28- 19, 223-13-11  муроҷиат кунед.