Рўзҳои 25-26 феврал дар Ҷумҳурии Тоҷикистон бориши борон ва барф пешгӯӣ мешавад. Ба маълумоти Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон 25-уми феврал дар бештари минтақаҳои водию доманакӯҳӣ ва шаҳри Душанбе бориши борон дар назар аст. Дар минтақаҳои кӯҳӣ охири рӯз бориши борон ба барф табдил меёбад.
26-уми феврал бошад дар водиҳо ва ноҳияҳои кӯҳӣ шабона гузариши борон ба барф дар назар аст. Дар бештари ноҳияҳои ҷумҳурӣ, ба истиснои минтақаҳои баландкӯҳ пастшавии ҳарорат то 10-12 дараҷа хунукиро ташкил медиҳад. Шамол аз самти ғарб бо гузариш ба шимолу ғарб бо суръати то 9-14 метр дар як сония, дар ноҳияҳои алоҳида бо шиддати то 20-25 метр дар як сония мевазад. Инчунин аз 25 - ум то 27-уми феврал бинобар бориши борон дар баъзе минтақаҳои кӯҳию доманакӯҳии вилояти Суғд, ноҳияҳои тобеи ҷумҳурӣ, шоҳроҳи нақлиётгарди Душанбе – Хуҷанд - Чанок (километрҳои 62-74-уми шоҳроҳ) ва ғарби Вилояти Мухтори Кӯҳистони Бадахшон фаромадани тарма пешгӯӣ мешавад. Вобабаста ба ҳолати мавҷуда, ба шаҳрвандон тавсия дода мешавад, ки дар чунин вазъи номусоиди обу ҳаво дар минтақаҳои кӯҳӣ ва баландкӯҳи ҷумҳурӣ эҳтиёткор бошанд.