Гурӯҳи корӣ зери роҳбарии муовини Вазири нақлиёти Ҷумҳурии Тоҷикистон Саидмуродзода Шоиста бо мақсади густариш додани ҳамкориҳо дар бахши нақлиёт ва логистика аз 5 - ум то 9-уми майи соли 2025 ба Ҷумҳурии Исломии Эрон сафар доштанд. Тибқи нақшаи пешакӣ вохӯриҳо ва мулоқот бо роҳбарияти Созмони банодир ва дарёнавардии Ҷумҳурии Исломии Эрон, роҳбарияти Минтақаи озоди иқтисодии Чобаҳор ва роҳбарияти Бандари “Чобаҳор” баргузор гардида, таваҷҷуҳ ба масъалаҳои ҳамкорӣ миёни Вазорати нақлиёти Ҷумҳурии Тоҷикистон ва Вазорати роҳҳо ва шаҳрсозии Ҷумҳурии Исломии Эрон оид ба иҷораи қитъаи замин дар ҳудуди Минтақаи озоди иқтисодии “Чобаҳор”-и Ҷумҳурии Исломии Эрон ва ҳамкориҳо барои ҷалби сармоя дар ин самт дода шуд. Дар ин радиф, мулоқоти дуҷонибаю бисёрҷониба бо Муҳиддинов Саидаҳтам - намояндаи ширкати “Холдинг Осиё гурӯҳ Тоҷикистон”, Ҳусейн Наср Киёмарс - намояндаи ширкати мазкур дар Эрон, Саидов Саидҷаъфар - муовини директори Муассисаи давлатии «Нақлиёти автомобилӣ ва хизматрасонии логистикӣ» -и Вазорати нақлиёти Ҷумҳурии Тоҷикистон, Ғуломзода Камол - сардори шуъбаи рушди хизматрасониҳои логистикӣ, лоиҳаҳо ва равобити байналмилалии ин муассиса баргузор гардид. Коршиносони сафарбаршудаи ҷониби Тоҷикистон аз фаъолият ва имкониятҳои бандари “Чобаҳор” шинос шуданд. Дар натиҷаи шиносоӣ ва вохӯриҳо муайян карда шуд, ки дар бандари “Чобаҳор” ва Минтақаи озоди Чобаҳор нақшаҳои бузурги сармоягузорӣ аз қабили сохтмони неругоҳи барқӣ, роҳи оҳан то минтақа, биноҳои нигоҳдории молу маҳсулот ва нақшаҳои васеъ кардани бандар барои зиёд намудани имконоти хизматрасониҳои ҳамлу нақл амалӣ гашта истодаанд, ки ин нуфузи бандари Чобаҳорро дар ҷаҳон баланд мебардорад.
Саид Расулӣ, муовини вазири роҳу шаҳрсозӣ ва мудиромили Созмони банодир ва дарёнавардии Эрон дар навбати худ барои тавсеаи ҳамкориҳои иқтисодӣ ва бозаргонӣ бо кишварҳои ҳамсоя таъкид намуд, ки ояндаи нек дар самти рушди тиҷорат ва бозаргонӣ моро интизор аст. Ҷонибҳо дар натиҷаи мулоқот ҷиҳати вусъат додани ҳамкориҳо қарорҳои дахлдор қабул намуданд.