Дар Раёсати Муассисаи давлатии «Нақлиёти автомобилӣ ва хизматрасонии логистикӣ» дар вилояти Суғд, ҷаласаи корӣ бо иштироки намояндагони масъули дастгоҳи марказии муассиса, кормандони ҷамъиятҳои нақлиётию логистикӣ ва дигар шахсони расмӣ баргузор гардид.
Дар маҷлис нахуст маърўзаи муовини аввали директори Муассисаи давлатии «Нақлиёти автомобилӣ ва хизматрасонии логистикӣ»  Ҷаҳонгир Пиров дар мавриди фаъолияти ширкат ва ҷамъиятҳои нақлиётӣ дар ин минтақа шунида шуд. Таъкид гардид, ки логистика яке аз соҳаҳои стратегӣ маҳсуб ёфта, дар раванди банақшагирӣ, татбиқ ва назорати ҷараёни интиқоли мол, хизмарасониҳо аз нуқтаи истеҳсол то нуқтаи истеъмол нақши аввалиндараҷа дошта, барои қонеъ гардонидани талаботи муштариён аҳмияти калон дорад. Занҷираи хуб идорашавандаи таъминот ва расмиёти муассири логистикӣ барои кам кардани хароҷот, нигоҳдорӣ ва баланд бардоштани самаранокӣ пешбини шудааст. Зеро нақлиёт ва логистика дар рушди иқтисодиёти кишварҳо нақши калидӣ дошта, ҳамкории боэътимод ва муассирро дар саросари ҷаҳон таъмин менамоянд. Феълан дар равандҳои хизматрасониҳои логистикӣ ширкатҳои махсус, ки ба логистика алоқаманданд, таъсисёфтанд, ки ҳаракати захираҳоро бо истифода аз техналогияи муосир суръат мебахшанд. Бинобар ин, бо дарназардошти  рақамикунонии инфрасохтори логистика  ва  таҷрибаи пешрафти ширкатҳо бо истифода аз техникаву техналогияи муосир ҷиҳати рушди хизматрасониҳои нақлиётию логистикӣ дар ин минтақа  ба иштирокдорони маҷлис  дастуру супоришҳо дода шуд.
Дар қисмати дуюми маҷлис таваҷҷуҳи иштирокдорон ба масъалаҳои  пешгирӣ аз ҳама гуна ҷинояту ҷинояткорӣ ва баланд бардоштани маърифати шаҳрвандӣ дода шуд. Сардори Раёсати кадрҳо ва таъминоти ҳуқуқии муассиса Зафар Холмаҳмадзода дар баромади худ мазмуну муҳтавои Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» ва «Дар бораи масъулият барои таълиму тарбияи кӯдак» - ро ба иштирокдорон шарҳ дода, таъкид намуд, ки Консепсияи сиёсати давлатии Ҷумҳурии Тоҷикистон таълиму тарбияи кӯдакро дар руҳияи инсондӯстӣ, ифтихори ватандорӣ, эҳтиром ба арзишҳои миллӣ, умумибашарӣ ва фарҳангӣ муайян карда, ба ҳифзи арзишҳои асили фарҳанги миллӣ, пешгирии хурофоту таассуб, баланд бардоштани маънавиёт ва барои беҳтар намудани сатҳи иҷтимоию иқтисодии мардуми Тоҷикистон равона гардидааст. Дар робита ба ин, аз иштирокдорон даъват ба амал оварда шуд, ки дар самти иҷрои талаботи Қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”,  “Дар бораи масъулият барои таълиму тарбияи кӯдак”  ва оид ба амалисозии Стратегияи муқовимат ба экстремизм, терроризм ва ҷиҳати баланд бардоштани маърифати зиддикоррупсионӣ бетараф набошанд.