Санаи 21-уми октябри соли равон дар асоси нақшаи чорабиниҳои Муассисаи давлатии «Нақлиёти автомобилӣ ва хизматрасонии логистикӣ» ҷиҳати амалисозии “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021–2025” дар толори маҷлисгоҳи Вазорати нақлиёти Ҷумҳурии Тоҷикистон ҷамъомади омӯзишӣ баргузор гардид. Дар кори ҷаласа намояндаи Прокуратураи генералии Ҷумҳурии Тоҷикистон - Прокурори калони Маркази ягонаи иттилоотӣ оид ба пешгирии экстремизм, терроризм ва киберҷиноятҳо, мушовири адлияи дараҷаи 2 Абдулҳайзода Сайфулло Шомуддин, роњбарият ва кормандони Муассиса иштирок карданд. Нахуст, муовини якуми директори Муассисаи давлатии «Нақлиёти автомобилӣ ва хизматрасонии логистикӣ» Ҷаҳонгир Пиров баромад карда, ҳозиринро хайрамақдам гуфт, баъдан иброз кард, ки дар шароити ҷаҳони муосир терроризм ба яке аз мушкилоти ҷиддӣ ва таҳдидҳои глобалӣ табдил ёфтааст. Ин зуҳуроти номатлуб на танҳо амнияти миллӣ ва суботи дохилии кишварҳоро халалдор месозад, балки ба сарнавишти инсоният, ба ояндаи башарият таъсири манфӣ мерасонад. Террористон бо истифода аз усулҳои зӯроварӣ, тарсфароӣ ва ғояҳои ифротгароёна кўшиш мекунанд ҷомеаро ба бесуботӣ кашанд ва ҳадафҳои ғайриинсонӣ ва сиёсии худро амалӣ намоянд. Баъди оғози ҳамоиш аз ҷониби роҳбарияти Муассиса намояндаи Прокуратураи генералии Ҷумҳурии Тоҷикистон Абдулҳайзода Сайфулло Шомуддин суханронӣ намуда, таъкид дошт, ки Ҷумҳурии Тоҷикистон ҳамчун узви фаъоли ҷомеаи ҷаҳонӣ аз рӯзҳои аввали соҳибистиқлолӣ то имрӯз муборизаи қотеонаро бар зидди терроризм ва экстремизм ба роҳ мондааст. Сиёсати давлатӣ дар самти таъмини амнияти миллӣ, ҳамкории зич бо созмонҳои байналмилалӣ ва татбиқи барномаҳои зиддитеррористӣ гувоҳи онанд, ки ҳукумати кишвар ба ин масъала бо масъулияти баланд муносибат мекунад. Пешвои миллат борҳо таъкид намудаанд, ки «терроризм дин, миллат ва Ватан надорад» ва муборизаи самаранок танҳо тавассути иттиҳоду ҳамбастагии кишварҳо имконпазир аст. Ҳамзамон, дар љаласа зикр гардид, ки “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021 -2025” бо Фармони Президенти Ҷумҳурии Тоҷикистон аз 1 июли соли 2021, №187 тасдиқ гардида, барои тақвияти ҳамкории ҳамаи ниҳодҳои давлатӣ ва ҷомеаи шаҳрвандӣ дар самти муборизаи дастаҷамъона бо ин падидаи хатарзо равона шудааст. Танҳо дар асоси ваҳдат, ҳамкорӣ ва эҳтироми арзишҳои умумибашарӣ метавонем ба ояндаи амну осуда ва зиндагии шоистаи мардум умед бандем.