Ифтитоҳи роҳи нави мумфаршу чароғон дар ноҳияи Восеъ
2025-10-24 02:33:04 | Диданд: 183
Пешвои миллат муҳтарам Эмомалӣ Раҳмон дар ноҳияи Восеъ роҳи нави мумфаршу чароғонро ифтитоҳ намуданд
22 октябри соли 2025 Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо мақсади шиносоӣ бо рафти корҳои ободонӣ ва ифтитоҳи иншооти муҳим ба ноҳияи Восеи вилояти Хатлон ташриф оварданд.
Дар доираи сафари корӣ Сарвари давлат дар деҳаи Заркамари деҳоти Миралиобод роҳи мумфаршу пурра чароғонро, ки бо саҳми сокинон ва соҳибкорони маҳаллӣ бо арзиши зиёда аз 2 миллион сомонӣ бунёд гардидааст, мавриди истифода қарор доданд.
Роҳи мазкур аз ду хати ҳаракат иборат буда, 12 километр тӯл дорад ва барои таъмин намудани рафтуомади бемамониати нақлиёт дар тамоми фаслҳои сол мусоидат мекунад.
Бунёди ин роҳ ба истиқболи 35-солагии Истиқлоли давлатии Ҷумҳурии Тоҷикистон ҳамчун туҳфаи арзишманд ба сокинони ноҳия амалӣ гардида, ба беҳтар шудани шароити зиндагӣ ва рушди иқтисодӣ мусоидат менамояд.
Дар баробари мумфаршкунӣ, дар канори роҳ истгоҳҳо, гузаргоҳҳои пиёдагард, ҷӯйборҳо ва дарахтони ороишӣ бунёд ва шинонида шудаанд. Чароғонкунии пурраи роҳ шабона ба бехатарӣ ва зебоии муҳит мусоидат мекунад.
Сарвари давлат муҳтарам Эмомалӣ Раҳмон саҳмгузории шаҳрвандон ва соҳибкорони маҳаллиро дар корҳои ободонӣ намунаи ибрат арзёбӣ намуда, дастур доданд, ки нигоҳубини роҳ мунтазам таъмин гардад, то солҳои зиёд ба мардум хизмат расонад.
