Санаи 15.02.2023 дар маҷлисгоҳи Вазорати нақлиёти Ҷумҳурии Тоҷикистон бо иштироки муовини Вазир Саидмуродзода Шоиста,  ҷаласа оид ба амалӣ намудан ва додани рухсатномаҳо барои ҳамлу нақли байналмилалии автомобилӣ тариқи барномаи электронӣ баргузор гардид. Барномаи электронии додани рухсатномаҳо, ки бо дастгирии ЮСАИД таҳия гардидааст барои баррасӣ ва пешниҳоди эроду иловаҳо дар шакли рунамо пешкаши иштирокчиён гардид. Дар вохӯрии мазкур сохторҳои Вазорати нақлиёт ва роҳбарони ширкатҳои байналмилалии нақлиётӣ иштирок намуда оид ба истифода бурдани барномаи электронӣ додани рухсатномаҳо ба масъулин саволҳо пешниҳод намуда ҷавобҳои қонеъкунандаро пайдо намуданд. Ёдовар мешавем, ки мақсади роҳандозӣ намудани барномаи  электронии додани рухсатномаҳо аз байн бурдани мушкилоти мавҷуда, таъсири омилҳои инсонӣ, таъмини шаффофият, осон намудани гирифтани рухсатномаҳо, дастрасӣ ба маълумотҳо оид ба рухсатномаҳо, инчунин дақиқ ба роҳ мондани маълумотҳои оморӣ дар ин самт мебошад.
      Ҳамзамон, дар рафти маҷлис директори Муассисаи давлатии «Нақлиётии автомобилӣ ва хизматрасонии логистикӣ» оид ба баъзе мушкилоти мавҷуда суханронӣ намуда, даъват ба амал бароварданд, ки ширкат (ҷамъият)-ҳои нақлиётӣ аз барномаи электронии роҳхату борхатҳо, ки муассиса онро ба роҳ мондааст, истифода намояд ва барои ҳарчи тезтар ба рақамикунонии соҳаи нақлиётӣ кишвар гузаштан мусоидат намоянд.  
      Дар ҷамъбасти маҷлис роҳбарияти Вазорат ба иштирокунандагони маҷлис ҷиҳати иштирок ва таклифу пешниҳодҳо изҳори сипос баён намуданд.